ಆತ್ಮೀಯ ಬಂಧುಗಳೇ,
ಷಣ್ಣಾಮಾತ್ಮಾನಿ ನಿತ್ಯಾನಾಮೈಶ್ವರ್ಯಂ ಯೋsಧಿಗಚ್ಛತಿ|
ನ ಸ ಪಾಪೈಃ ಕುತೋನರ್ಥೈರ್ಯುಜ್ಯತೇ ವಿಜಿತೇನ್ದ್ರಿಯಃ||
ಮಹಾಭಾರತದಲ್ಲಿನ ವನಪರ್ವದಲ್ಲಿ ಬರುವ ಮಾತಿದು. ಯಾರಿಗೆ ತಮ್ಮ ಮನಸ್ಸಿನ ಮೇಲೆ ಹತೋಟಿಯಿದ್ದು ಅದನ್ನು ಜಯಿಸಿರುತ್ತಾರೋ ಅವರಿಗೆ ಪಾಪದ ಲೇಪವಿರುವುದಿಲ್ಲ. ಯಾವ ವಿಧವಾದ ಅನರ್ಥಗಳೂ ಅವನಿಗೆ ಆಗುವುದಿಲ್ಲ. ಮುಂದುವರೆದು ಮನುಷ್ಯದ ಶರೀರವು ರಥವಿದ್ದಂತೆ ಅದನ್ನು ನಡೆಸುವ ಸಾರಥಿಯೆಂದರೆ ಶರೀರದಲ್ಲಿರುವ ಜೀವ. ಮನಸ್ಸಿನಿಂದ ಕೂಡಿದ ಪಂಚೇಂದ್ರಿಯಗಳು ಆರು ಕುದುರೆಗಳಿದ್ದಂತೆ. ಅವನ್ನು ಧೀರನಾದ , ಚಾಣಾಕ್ಷನಾದವನು ವ್ಯವಸ್ಥಿತವಾಗಿ ನಡೆಸಿದಾಗ ಬದುಕಿನ ರಥ ಸೊಗಸಾಗಿ ಪುಣ್ಯಲೇಪದಿಂದ ಸಾಗುತ್ತದೆ. ಇಲ್ಲದಿದ್ದರೆ ಅದು ಪಾಪಲೇಪಿತವೇ ಆಗಿರುತ್ತದೆ. ಇತ್ತೀಚಿನ ಬೆಳವಣಿಗೆಯಲ್ಲಿ ಪಂಚೇಂದ್ರಿಯಗಳ ಹತೋಟಿಯನ್ನು ಹೊಂದಿದ ನೇತಾರರಿಲ್ಲದೆ ಉದ್ಯಮಗಳು ಎಡವಿ ಬೀಳುವಂತಾಗಿದೆ. ಸ್ವಾರ್ಥ, ಅಸೂಯೆಯಿಂದ ಲೇಪಿತವಾದ ಮನಸ್ಸನ್ನಿಟ್ಟುಕೊಂಡು ಉದ್ಯಮವಾಗಲೀ ರಾಷ್ಟ್ರವನ್ನಾಗಲೀ ನಡೆಸಲು ಸಾಧ್ಯವೇ? ಹೊಸ ಉದ್ಯಮವನ್ನು ಸ್ಥಾಪಿಸಲು ನಮ್ಮ ಬಳಿ ಬಂದ ವ್ಯಕ್ತಿಗೆ ಮತ್ತೊಂದು ಅದೇ ರೀತಿಯ ಕಂಪನಿಯನ್ನು ಬೀಳಿಸಿ ತನ್ನದನ್ನು ಕಟ್ಟಬೇಕೆಂಬ ಹಠ. ಆದರೆ ಅದು ಸಾಧ್ಯವಾಗದೇ ಹೋದಾಗ ಕ್ಷುದ್ರನಾಗುವುದರಿಂದ ಅವನ ಮತ್ತು ಅವನ ಸುತ್ತಲಿನ ವಾತಾವರಣ ಕೆಡುತ್ತದೆಂಬ ಕಿಂಚಿತ್ ಪರಿಜ್ಞಾನವೂ ಇಲ್ಲ ಆತನಿಗೆ. ಉನ್ನತಿಗೆ ಶಾರ್ಟ್ ಕಟ್ ಗಳಿಲ್ಲ. ಸಾಧ್ಯನೆ ತಪಸ್ಸಿನಿಂದ ಮಾತ್ರ ಸಾಧ್ಯ. ಇವೆಲ್ಲವೂ ಗುಣಗಳಲ್ಲಿ ಅಡಗಿದೆ