ಬೊಂಬೆಗಳನ್ನು ತಯಾರಿಸುವ ಉದ್ಯಮವು ಹೆಚ್ಚು ಕ್ರಿಯಾಶೀಲವಾಗಿರಬೇಕಾಗುತ್ತದೆ. ಪ್ರಸ್ತುತ ವಿಷಯಗಳನ್ನು ಗ್ರಹಿಸುತ್ತಾ ಅದನ್ನು ನಮ್ಮ ಸಂಸ್ಕೃತಿಗೆ ಒಗ್ಗಿಸಿಕೊಳ್ಳುವುದು ಸಹ ಬೊಂಬೆಗಳನ್ನು ತಯಾಸಿರುವ ಕಲಾವಿದನ ಮನೋಚಳಕಕ್ಕೆ ಎಷ್ಟು ಬೆಲೆ ಕಟ್ಟಿದರೂ ಕಡಿಮೆಯೇ ಆಗುತ್ತದೆ. ಬೊಂಬೆಗಳನ್ನು ಕೂರಿಸುವ ಸಂಪ್ರದಾಯವಿದ್ದುದರಿಂದ ಕಲೆಗೆ ಮತ್ತು ಕಲಾವಿದನಿಗೆ ಇದೊಂದು ಉದ್ಯಮವಾಗಿ ಮುಂದುವರೆಯಲಿಕ್ಕೆ ಸಾಧ್ಯವಾಯಿತು. ಸಮಯದ ಅಭಾವ ಮತ್ತು ಬೊಂಬೆಗಳನ್ನು ಉಳಿಸಿಕೊಂಡು ಹೋಗುವ ಉತ್ಸಾಹವಿಲ್ಲದೆ ಹೋದುದರಿಂದ ಅನೇಕರ ಮನೆಯಲ್ಲಿ ನೆಪಮಾತ್ರಕ್ಕೆ ಬೊಂಬೆಗಳನ್ನು ಕೂರಿಸಲಾಗುತ್ತಿದೆ. ಎಷ್ಟೋ ಮನೆಗಳನ್ನು ಸರಸ್ವತಿ ಹಬ್ಬದಂದು ಮಾತ್ರ ಬೊಂಬೆಗಳನ್ನು (ಅದರಲ್ಲೂ ಪಟ್ಟದ ಬೊಂಬೆಗಳನ್ನು) ಕೂರಿಸಿದ ಶಾಸ್ತ್ರ ಮಾಡಿ ಮುಗಿಸುತ್ತಾರೆ. ಕಲೆ ಬೆಳೆಯುವುದು ಗ್ರಾಹಕನಿಂದಲೇ. ಕಲಾವಿದ ಬೆಳೆಯುವುದು ಸಹ ಗ್ರಾಹಕನಿದ್ದಾಗಲೇ. ಕಲಾಪುಷ್ಟಿ ಸಿಗುವುದು ನಮ್ಮ ಸಂಪ್ರದಾಯದ ಆಚರಣೆಗನ್ನು ಅಷ್ಟೇ ಶ್ರದ್ಧೆಯಿಂದ ಮಾಡಿದಾಗ ಮಾತ್ರ. ದಕ್ಷಿಣ ಭಾರತದಲ್ಲಿ ಈ ಸಂಪ್ರದಾಯ ಹೆಚ್ಚು ಪ್ರಮುಖವಾಗಿದೆ. ಉತ್ತರದಲ್ಲಿ ಅಷ್ಟಾಗಿ ಕಂಡುಬರುವುದಿಲ್ಲ.