ಆತ್ಮೀಯರೇ,
ನವೆಂಬರ್ ತಿಂಗಳೆಂದರೆ ಕರ್ನಾಟಕ ರಾಜ್ಯೋತ್ಸವದ ಸಂಭ್ರಮ. ಬೇರಾವ ರಾಜ್ಯದಲ್ಲೂ ಇರದ ವಿಜೃಂಭಣೆ ನಮ್ಮಲ್ಲಿ ನಡೆಯುತ್ತದೆ. ನಾವು ಭಾಷಾ ಪ್ರೇಮಿಗಳೂ ಮತ್ತು ಪರಭಾಷೆಯನ್ನೂ ಸಹ ನಮ್ಮ ಭಾಷೆಯಷ್ಟೇ ಆದರಿಸುವವರೂ ಆಗಿದ್ದೇವೆ. ಉನ್ನತ ಮೌಲ್ಯದ ಕೃತಿಗಳು ಎಲ್ಲೇ ಬಂದರೂ ಅದೂ ನಮ್ಮಲ್ಲೂ ಬರಲಿಮ್ ನಮ್ಮ ಓದುಗರನ್ನೂ ತಲುಪಲಿ ಎನ್ನುವ ಜ್ಞಾನ ಪ್ರೇಮ ನಮ್ಮದು. ಇದರ ಜೊತೆಗೆ ನಾವು ಕನ್ನಡ ಸಾಹಿತ್ಯದ ಮೌಲ್ಯವನ್ನೂ ಪರಿಗಣಿಸಬೇಕು. ಉತ್ತಮವಾದ ಬರಹಗಳು, ಮೌಲ್ಯಯುತವಾದ್ ಮಾಹಿತಿಯುಳ್ಳ ಪುಸ್ತಕಗಳು ನಮ್ಮಲ್ಲಿ ಅನೇಕವು ಬಂದಿವೆ ಬರುತ್ತಲೂ ಇವೆ. ಅವನ್ನು ನಾವು ಮತ್ತೊಂದು ಭಾಷಿಕರನ್ನು ತಲುಪುವಂತೆ ನೋಡಿಕೊಳ್ಳಬೇಕಾಗುವುದು ನಮ್ಮ ಜವಾಬ್ದಾರಿಯೂ ಆಗಿದೆ. ಕುವೆಂಪು ಭಾಷಾ ಭಾರತಿಯು ಈಗಾಗಲೇ ಅದನ್ನು ಮಾಡುತ್ತಲಿದೆ. ಸಾಹಿತ್ಯವು ಒಂದು ಭಾಷೆಗೆ ಸೀಮಿತವಾಗದಂತೆ ಕಾಯುವುದು ನಮ್ಮ ಜವಾಬ್ದಾರಿಯಾಗಿದೆ. ಆ ನಿಟ್ಟಿನಲ್ಲಿ ದ್ವಿಜ ತಂಡವು ಜ್ಞಾನ ಪ್ರಸರಣ ಕಾರ್ಯದಲ್ಲಿ ತನ್ನ ಹೆಜ್ಜೆ ಇಡುತ್ತಲಿದೆ. ಅದರ ಮೊದಲ ಭಾಗವಾಗಿ ತನ್ನದೇ ಆದ ಸ್ವಂತ ಪ್ರಕಾಶನ ಸಂಸ್ಥೆಯನ್ನು ಆರಂಭಿಸಿ ಅಕಾಡೆಮಿಕ್ ಆದ ಬರಹಗಳನ್ನು ತರುವ ಯೋಜನೆಯನ್ನು ಹಾಕಿಕೊಳ್ಳುತ್ತಿದೆ. ಈಗಾಗಲೇ ಇದೇ ಪತ್ರಿಕೆಯಲ್ಲಿ ಶ್ರೀಮತಿ ಸೌಮ್ಯಾ ಹಿಮಗಿರೀಶ್ ರವರು ಬರೆದ ವೈದ್ಯ ಬರಹಗಳನ್ನು ಒಂದೆಡೆ ಸೇರಿಸಿ ಪುಸ್ತಕ ರೂಪದಲ್ಲಿ ತರುತ್ತಿದೆ. ಇಡಿಯ ಲೇಖನ ಗುಚ್ಛವು ಸಾರ್ವಕಾಲಿಕವಾದ ಅಂಶಗಳನ್ನು ಒಳಗೊಂಡಿದೆ. ಕಾರಣ ವೈದ್ಯಕೀಯ ಸಂಗತಿಗಳು ಹೊಸ ಪದ್ಧತಿ ಬರುವವರೆಗೂ ಬದಲಾಗದ್ದು. ಅಲ್ಪ ಸ್ವಲ್ಪ ಬದಲಾವಣೆಗಳಿದ್ದರೂ ಮೂಲ ಲಕ್ಷಣಗಳು ಬದಲಾಗದು. ಮತ್ತೊಂದು ಪುಸ್ತಕ ಶ್ರೀಮತಿ ಸುಮನಾ ರವರದ್ದು. ಸಂದರ್ಶನಗಳನ್ನು ಹೇಗೆ ಆನಂದಿಸಬೇಕು ಮತ್ತು ಅದಕ್ಕೆ ಬೇಕಾದ ತಯಾರಿಗಳೇನು ಎನ್ನುವುದರ ಬಗೆಗಿನ ಅವರ ಲೇಖನಗಳು ಅನೇಕರಿಗೆ ಮೆಚ್ಚುಗೆಯಾಗಿದೆ. ಮೂಲತಃ ಅದು ಇಂಗ್ಲೀಷ್ ಭಾಷೆಯಲ್ಲಿದೆ ಅದನ್ನು ಕನ್ನಡಕ್ಕೆ ಅನುವಾದಿಸಿ ಮತ್ತೊಮ್ಮೆ ಬಿಡುಗಡೆ ಮಾಡಲಾಗುತ್ತದೆ. ಇವೆಲ್ಲವೂ ಉದ್ಯಮದ ವೃತ್ತಿಯ ಬಗೆಗಿನ ಬರಹಗಳು.