ಹೊಸ ಕೈಗಾರಿಕೆಗಳನ್ನು ಅೆಥವಾ ಉದ್ಯಮವನ್ನು ಆರಂಭಿಸುವಾಗ ಸರಕಾರದ ನೀತಿ ನಿಬಂಧನೆಗಳನ್ನು ಗಣನೆಗೆ ತೆಗೆದುಕೊಂಡು, ಸರಕಾರ ಕೊಡಮಾಡುವ ಸರ್ಟಿಫಿಕೇಟ್ ಗಳನ್ನು ಜೊತೆಗಿರಿಸಿಕೊಂಡು ಉದ್ಯಮವು ಗ್ರಾಹಕ ಅಥವಾ ಜನಸ್ನೇಹಿ ಆಗುವಂತೆ ಮಾಡಲು ತಯಾರಿ ನಡೆಸುತ್ತದೆ. ಪ್ರತಿ ವರ್ಷ ಉದ್ಯಮದ ವಿವರಗಳನ್ನು ಸರಕಾರಕ್ಕೆ ನೀಡುತ್ತಾ ಪಾರದರ್ಶಕತೆಯನ್ನು ಪ್ರದರ್ಶಿಸುತ್ತದೆ. ಉದ್ಯಮವು ಸರಕಾರದ ಅಧೀನವಲ್ಲದಿದ್ದರೂ ವಂಚಕ ಉದ್ಯಮಿಗಳಿಂದ ಗ್ರಾಹಕ ಮತ್ತು ನೌಕರರಿಗೆ ಮೋಸವಾಗದಂತೆ ನೋಡಿಕೊಳ್ಳುವುದು ಸರಕಾರದ ಜವಾಬ್ದಾರಿ. ಈ ಎಲ್ಲಾ ಕಾರಣಗಳಿಗೆ ಉದ್ಯಮ ಮತ್ತು ಸರಕಾರ ಒಂದಕ್ಕೊಂದು ಹೆಣೆದುಕೊಂಡ ಸಂಸ್ಥೆಗಳಾಗಿವೆ. ಉದ್ಯಮವು ಪಾರಲಲ್ ಆಗಿ ಸರಕಾರವನ್ನು ರಚಿಸಬಾರದು. ಸರಕಾರವನ್ನೇ ನಿಯಂತ್ರಿಸುವ ಮಟ್ಟಕ್ಕೆ ಅಥವಾ ಕೃತ್ಯಕ್ಕೆ ಹೋಗಬಾರದು. ಇಡಿಯ ದೇಶಕ್ಕೆ ಅದು ಮಾರಕ. ಯಾವುದೇ ಸಂಸ್ಥೆಯು ನಿಯಮ ಮೀರಿ ನಡೆಯುತ್ತಿದ್ದರೆ ಅದಕ್ಕೆ ದಂಡನೆಯನ್ನು ನೀಡುವ ಅಧಿಕಾರವು ದೇಶ ಹಿತವನ್ನು ಕಾಯುವ ಸಂಸ್ಥೆಗಿರಬೇಕು. ಅದನ್ನು ಸರಕಾರವೆನ್ನಬಹುದು. ಹಾಗಾದರೆ ಈ ಸರಕಾರವನ್ನು ಆರಿಸುವ ನಮ್ಮ ಜವಾಬ್ದಾರಿ ಎಷ್ಟು ದೊಡ್ಡದು?