ಮಹಾಭಾರತದ ವಿದುಲಾಳ ಪಾತ್ರ ವಿಭಿನ್ನವಾದದ್ದು. ಸೋತ ಮಗನಿಗೆ ಶಕ್ತಿಯನ್ನು ಕೊಡುವ ಮತ್ತು ಅವನನ್ನು ಜರಿಯುತ್ತಲೇ ಅವನಲ್ಲಿ ಛಲವನ್ನು ಹುಟ್ಟಿಸುವ ಪಾತ್ರ ವಿದುಲಾಳದ್ದು. ಅಂತಹ ಮಹಾನ್ ತಾಯಂದಿರಿಗೆ ನನ್ನ ನಮಸ್ಕಾರಗಳು. ಪರೀಕ್ಷೆಯ ಕಾಲ ಬರುತ್ತಿದೆ. ಎಲ್ಲರೂ ಪರೀಕ್ಷೆಗೆ ಸಿದ್ಧರಾಗುತ್ತಿರಬೇಕಾದರೆ ವಿದುಲಾ ನೆನಪಾಗಿಬಿಟ್ಟಳು. ಮಾರ್ಚ್ ತಿಂಗಳಿನಲ್ಲಿ ಮಹಿಳೆಯರ ದಿನಾಚರಣೆಯೂ ಸೇರಿ ಸ್ತ್ರೀ ಶಕ್ತಿ ಮತ್ತಷ್ಟು ಪ್ರಬಲವಾಗಿ ಹೊಮ್ಮುತ್ತಿದೆ. ತಂದೆಯಾದವನು ಬೈದು ಬುದ್ಧಿ ಹೇಳಿದರೆ ತಾಯಿಯಾದವಳು ಬೈಯುವುದೂ ಹೌದು ತಲೆ ಸವರಿ ಮಡಿಲಲ್ಲಿ ಮಲಗಿಸಿಕೊಂಡು ಶಕ್ತಿಯನ್ನೂ ತುಂಬಿಬಿಡುತ್ತಾಳೆ. ಪ್ರಾಯಃ ಸ್ತ್ರೀತ್ತ್ವದ ಲಕ್ಷಣವೇ ಮಮತೆ, ಕರುಣೆ, ಧೈರ್ಯ. ನನಗೇನೂ ಬೇಡವೆಂದು ಗಂಡು ಹೊರಟುಬಿಡಬಹುದು ಆದರೆ ಹೆಣ್ಣು ಬಿಡಲಾರಳು. ಪ್ರಕೃತಿಯೇ ತಾನಾದ ಅವಳಿಗೆ ಎಲ್ಲವೂ ಹಸಿರೇ. ಬಿತ್ತಿ ಬೆಳೆದು ಫಸಲು ಕೊಟ್ಟು ಸಮಾಜಕ್ಕೆ ಒಂದಷ್ಟು ಶಕ್ತಿಯುತ ತಳಿಯನ್ನು ಕೊಡುವ ತಾಯಂದಿರು ಅದೆಷ್ಟೋ.