ಮೇಲಿನ ಸಾಲುಗಳನ್ನು ತೈತ್ತರೀಯ ಬ್ರಾಹ್ಮಣದಿಂದ ಆರಿಸಲಾಗಿದೆ. ಇದರ ಸಾರಾಂಶವಿಷ್ಟು, ಗೌರವರ್ಣದವಳಾದ ವಾಗ್ದೇವಿಯು ಪ್ರಪಂಚವನ್ನು ಸೃಷ್ಟಿಸುವಾಗ ಮಹಾ ಶಬ್ದವನ್ನು ಮಾಡಿದಳು ಅದರ ಪ್ರಣವಾಕಾರದಿಂದ ಏಕಪದಿಯೂ, ದ್ವಿಪದಿಯೂ, ಚತುಷ್ಪದಿಯೂ, ವೇದಾಂಗಗಳು ಪುರಾಣ ಧರ್ಮಗಳೂ ಸೇರಿದಂತಹ ಅಷ್ಟಪದಿಯೂ, ಮೀಮಾಂಸದಿಂದಾದಿಯಾಗಿ ಗಾಂಧರ್ವದ ವರೆಗಿನ ನವಪದಿಯೂ ಮತ್ತು ಹೆಚ್ಚಿನ ವಾಕ್ಯ ಸಂದರ್ಭಗಳಿಂದ ಸಹಸ್ರಾಕ್ಷಳೂ ಅದಳು.

ಈ ವಾಗ್ದೇವಿಯ ದಯೆಯಿಂದ ಭಾಷೆಗಳು ವಿಧ ವಿಧವಾಗಿ ಗೋಚರಿಸುತ್ತವೆ. ಅವುಗಳ ಶಬ್ದಗಳಿಂದ ಜೀವಿಗಳು ನಾಲ್ದಿಕ್ಕುಗಳಲ್ಲಿ ಜೀವಿಸುತ್ತವೆ. ಭಾಷೆಯೆನ್ನುವುದು ಮನಸ್ಸಿನ ಉತ್ಸವಮೂರ್ತಿ. ನಮ್ಮೊಳಗೆ ಬಂದ ಭಾವವನ್ನು ಹೊರಗೆ ಪ್ರವೇಶಪಡಿಸುವುದಕ್ಕೆ ಭಾಷೆಯು ವಾಹನವಾಗಿದೆ. ಅದನ್ನು ಮಾತೆಂದು ಆ ಮಾತು ಭಾಷೆಯ ರೂಪದಲ್ಲಿ ಮತ್ತೊಬ್ಬನ ಕಿವಿಗೆ ಪ್ರವೇಶಿಸಿ ನಮ್ಮ ಅನಿಸಿಕೆಯನ್ನು ಅವನಿಗೆ ದಾಟಿಸುತ್ತದೆ. ಹುಟ್ಟಿದ ಮಗು ’ಮ್’ ಕಾರವನ್ನ್ ಮೊದಲು ಉಚ್ಚರಿಸುತ್ತದೆ ತುಟಿಮುಚ್ಚಿ ತೆರೆಯುವಾದ ಗಾಳಿ ಕಂಠದಿಂದ ಹೊರಬರುವಾಗ ಈ ಶಬ್ದ ಉತ್ಪತ್ತಿಯಾಗುತ್ತದೆಯೆನ್ನುವುದು ತಿಳಿದೇ ಇದೆ.

ಇಂತಹ ಮಗು ಬೆಳೆಯುತ್ತಾ ಸುತ್ತಲಿನ ಜನರ ತುಟಿಚಾಲನೆ, ಶಬ್ದಗಳನ್ನು ಗ್ರಹಿಸುತ್ತಾ, ನೋಡುತ್ತಾ ಪದಗಳನ್ನು, ವಾಕ್ಯಗಳನ್ನು ನಿಧಾನವಾಗಿ ಕಲಿಯುತ್ತದೆ. ಭಾಷಾಃ ಸಂಕೇತವಶಾತ್ ಪದಾರ್ಥಗೋಚರಪ್ರವೃತ್ತಿ ನಿವೃತ್ತಿ ರೂಪವ್ಯವಹಾರೌಪಯಿಕ ವಾಗ್ವಿಶೇಷಾಃ ಎನ್ನುತ್ತಾನೆ ಭಟ್ಟಾಕಲಂಕ. ಭಾಷೆಯು ಸಂವಹನಕ್ಕೆ, ಸಂಭಾಷಣೆಗೆ ಅತೀ ಅಗತ್ಯವಾಗಿದೆ. ಉದ್ಯಮದಲ್ಲಂತೂ ಭಾಷೆಯ ಮಹತ್ತ್ವ ಮತ್ತೂ ಹೆಚ್ಚು. ನಮ್ಮ ಉದ್ಯಮದ ವಿವರಗಳನ್ನು ಗ್ರಾಹಕನಿಗೆ ತಲುಪಿಸುವುದಕ್ಕೆ ಪರಿಣಾಮಕಾರಿಯಾದ ಭಾಷೆಯ ಬಳಕೆ ಬೇಕೇ ಬೇಕು.

ಇಂತಹ ಭಾಷೆಗಳಲ್ಲಿ ಕನ್ನಡವು ಉನ್ನತ ಸ್ಥಾನವನ್ನು ಪಡೆದುಕೊಂಡಿದೆ. ಕನ್ನಡ ದ ಗ್ರಂಥ ಸಾಹಿತ್ಯವು ಮತ್ತು ಸಾಮಾನ್ಯ ಜನರ ಮಾತಿನ ಸಾಹಿತ್ಯವು ಎರಡೂ ಕನ್ನಡವನ್ನು ಒರೆಗೆ ಹಚ್ಚುತ್ತಾ ವಜ್ರದಂತೆ ಹೊಳಪನ್ನೀಯುತ್ತಿದೆ. ಇಂತಹ ಭಾಷೆಯ ಉತ್ಸವನ್ನು ಮಾಡುವ ಕನ್ನಡಿಗರು ಧನ್ಯರು. ಗ್ರಂಥಸ್ಥ ರೂಪದಲ್ಲಿ ಅಥವಾ ಮುದ್ರಿತ ರೂಪದಲ್ಲಿ ಬಂದ ಸಾಹಿತ್ಯವು ದಾಖಲೆಯಾಗಿ ಉಳಿಯುತ್ತಿದೆ. ಅದೇ ರೀತಿಯಲ್ಲಿ ಮೌಖಿಕ ಸಾಹಿತ್ಯವು ಶೃತ ಶ್ರೌತಗಳಲ್ಲಿ ನೆಲೆ ನಿಂತು , ಪರಂಪರೆಯಲ್ಲಿ ದಾಟುತ್ತಾ ಬರುತ್ತಿದೆ. ಇವೆರಡೂ ಕನ್ನಡ ಕೊಡುಗೆಗಳು. ದ್ವಿಜೋದಯ ಮುದ್ರಿತ ದಾಖಲೆಯಾಗಿ ಉದ್ಯಮದ ವಿವರಗಳನ್ನು ಹೊತ್ತು ಕನ್ನಡ ಸಾಹಿತ್ಯಕ್ಕೆ ತನ್ನ ಅಳಿಲು ಸೇವೆಯನ್ನು ಸಲ್ಲಿಸುತ್ತಿದೆ. ಇದು ಹೀಗೇ ಮುಂದುವರೆದು ಸಾಹಿತ್ಯಾತ್ಮಕ ರೂಪದಲ್ಲೂ ಸಹ ದ್ವಿಜೋದಯವು ಎಲ್ಲರನ್ನೂ ಮುಟ್ಟಲಿ ಎನ್ನುವ ಆಶಯದೊಂದಿಗೆ ಓದುಗ ಬಂಧುಗಳಿಗೆ ಕರ್ನಾಟಕ ರಾಜ್ಯೋತ್ಸವ ಶುಭಾಶಯಗಳು