ಕ್ಯಾಲೆಂಡರ್ ಹೊಸ ವರ್ಷಕ್ಕೆ ಅಡಿಯಿಡುತ್ತಿದ್ದೇವೆ. ಪ್ರಕೃತಿಯಲ್ಲಿ ಯಾವ ಬದಲಾವಣೆಯಾಗದಿದ್ದರೂ ಅನೇಕ ವರ್ಷಗಳಿಂದ ಈ ಆಚರಣೆಯನ್ನು ಆಚರಿಸುತ್ತಿರುವುದರಿಂದ ಇದಕ್ಕೊಂದು ಮಹತ್ವ ಬಂದಿದೆ. ಪ್ರಸಕ್ತ ಸನ್ನಿವೇಶದಲ್ಲಿ ಹೊಸ ವರ್ಷಕ್ಕೊಂದು ಸ್ಪಷ್ಟ ಗುರಿಯನ್ನು ಹೊಂದುವ ನಿರ್ಧಾರವನ್ನು ಮಾಡುವವರು ಅನೇಕರಿದ್ದಾರೆ. ಉದ್ಯಮದಲ್ಲೂ ಸಹ ಹೊಸ ವರ್ಷಕ್ಕೆ ಹೊಸ ಪ್ರಯೋಗಗಳು ಸಾಹಸಗಳನ್ನು ಮಾಡುವ ಉದ್ಯಮಿಗಳಿದ್ದಾರೆ. ಆತ್ಮೀಯ ಉದ್ಯಮಿಗಳೇ ನಿಮ್ಮ ಹೊಸ ಸಾಹಸವನ್ನು ಆರಂಭಿಸುವ ಮುನ್ನ ಉತ್ಸಾಹ, ಖಚಿತತೆ, ಸ್ಪಷ್ಟತೆ, ಆರ್ಥಿಕ ಬಲಾಬಲಗಳನ್ನು ತಿಳಿದುಕೊಂಡು ಮುನ್ನುಗ್ಗಿ. ಚಾಲೆಂಜ್ ಗಳು ನಮ್ಮನ್ನು ಸದಾ ಹೊಸ ಅನುಭವಕ್ಕೆ ತೆರೆದಿಡುತ್ತವೆ. ಬುದ್ಧಿಯನ್ನು ಚುರುಕು ಮಾಡುವುದರಿಂದ ಸವಾಲುಗಳನ್ನು ಎದುರಿಸುವ ಸ್ಥೈರ್ಯವನ್ನು ಮತ್ತು ಚುಬುಕುತನವನ್ನೂ ನೀಡುತ್ತದೆ. ಏಕತಾನತೆಯು ಅನೇಕ ಬಾರಿ ಸಾಚುರೇಷನ್ ಬಿಂದುವಿನಲ್ಲಿ ನಮ್ಮನ್ನು ನಿಲ್ಲಿಸಿಬಿಡುವ ಸಾಧ್ಯತೆ ಇರುತ್ತದೆ. ಒಂದೇ ಬಗೆಯ ಕೆಲಸವನ್ನು ಮಾಡುತ್ತಾ ಮನಸ್ಸು ಕವಲುದಾರಿಯನ್ನು ಹುಡುಕುತ್ತದೆ ಮತ್ತು ಅಡ್ಡದಾರಿಯ ಬುದ್ಧಿಯನ್ನು ಹೆಚ್ಚಿಸುತ್ತದೆ. ಮನಸ್ಸು ಏನಾದರೂ ಒಂದು ಮಾಡುತ್ತಲೇ ಇರಬೇಕು. ಅದು ಚಿಕ್ಕದಿರಲಿ ಅಥವಾ ದೊಡ್ಡದಿರಲಿ.