ದ್ವಿಜೋದಯದ ಓದುಗರಿಗೆ, ಸುತ್ತಲಿನ ಪ್ರಕೃತಿ ಹೊಸತೊಂದು ರೂಪವನ್ನು ಪಡೆಯುವ ಯುಗಾದಿ ಹಬ್ಬದ ಶುಭಾಶಯಗಳು. ವಿವಿಧ ಬಣ್ಣಗಳಿಂದ ಕಂಗೊಳಿಸುವ ಚಿಗುರು, ಹೂವುಗಳ ಅಂದವನ್ನು ಸವಿಯದ ಅರಸಿಕರು ಭಾರತದಲ್ಲಿಲ್ಲ. ದಾರಿಗುಂಟ ಸಾಗುವಾಗ ಸಿಗುವ ಮರಗಿಡಬಳ್ಳಿಗಳನ್ನು ಗಮನಿಸಿ ಅಲ್ಲಿನ ವೈಚಿತ್ರ್ಯಗಳನ್ನು ಮನಸ್ಸಿಗೆ ತಂದುಕೊಂಡಾಗ ಮುದಗೊಳ್ಳುವುದು ರಸಿಕರ ಹೃದಯ. ಇದು ಜ್ಞಾನ-ವಿಜ್ಞಾನಗಳ ಬಾಂಧ್ಯವ್ಯ. ಇದೇ ಧಾಟಿಯಲ್ಲಿ ನಾವು ನಮ್ಮ ಉದ್ಯಮದ ಆಸುಪಾಸು ಗಮನಿಸುತ್ತಾ ಹೋದಾಗ ಅಲ್ಲಿನ ಸ್ಥಿರತೆ, ಅಳ್ಳಕ, ಎಲ್ಲವೂ ತಿಳಿಯುವುದು ಸಾಧ್ಯ. ಶಂಕರ ಭಗವತ್ಪಾದ ಗೀತಾ ಭಾಷ್ಯದಲ್ಲೊಂದು ಮಾತಿದೆ ” ಜ್ಞಾನಂ ಶಾಸ್ತ್ರೋಕ್ತಪದಾರ್ಥಾನಾಂ ಪರಿಜ್ಞಾನಂ, ವಿಜ್ಞಾನಂ ತು ಶಾಸ್ತ್ರತೋ ಜ್ಞಾತಾನಾಂ ತಥೈವ ಸ್ವಾನುಭವಕರಣಂ” ಎಂದರೆ ಜ್ಞಾನವೆಂದರೆ ಥಿಯರಿಯ ಮೂಲಕ ತಿಳಿದುಕೊಳ್ಳುವ ಸಂಗತಿ, ವಿಜ್ಞಾನವು ಅದನ್ನೇ ಪ್ರಾಕ್ಟಿಕಲ್ ರೀತಿಯಲ್ಲಿಅನುಭವಕ್ಕೆ ತಂದುಕೊಡುತ್ತದೆ. ನಾವು ಉದ್ಯಮದ ಬಗೆಗೆ ಕೇಳಿ ತಿಳಿದುಕೊಂಡ ಜ್ಞಾನವು ಒಂದೆಡೆಯಾದರೆ ಅದೇ ಉದ್ಯಮದೊಳಗೆ ಇಳಿದಾಗ ಆಗುವ ಅನುಭವ ನಮ್ಮನ್ನು ಮತ್ತಷ್ಟು ಪಕ್ವಗೊಳಿಸುತ್ತದೆ.