೨೦೨೩ ಕ್ಯಾಲೆಂಡರ್ ಬದಲಾಗುವ ತಿಂಗಳಿದು. ಸಂಕಲ್ಪಗಳು, ಸಾಧನೆಗೆ ಸ್ವಾಗತವನ್ನೀವ ಪ್ರಮಾಣ ಪ್ರಯಾಸಗಳೂ ಎಲ್ಲವೂ ಈ ತಿಂಗಳಲ್ಲೇ ನಡೆಯುತ್ತವೆ. ಮನಃಶಾಸ್ತ್ರೀಯವಾಗಿ ನೋಡುವುದಾದರೆ , ಯಾವುದಾದರೊಂದು ತುಡಿತಕ್ಕೆ ಕಿಡಿ ಬೇಕಾಗುತ್ತದೆ ಅದಕ್ಕೆ ಹಲವು ದಾರಿಗಳಿವೆ ಅದರಲ್ಲಿ ನ್ಯೂ ಇಯರ್ ಎನ್ನುವ ಈ ಸಂಭ್ರಮವೂ ಒಂದು ಕಿಡಿ. ಮುಂದಿನ ವರ್ಷ ಇಂಥದ್ದನ್ನು ಸಾಧಿಸುತ್ತೇನೆ ಎನ್ನುವ ಮಾತಿನಲ್ಲಿ ಸಂಕಲ್ಪವೊಂದು ಉದ್ಭವವಾಗಿ ಕೆಲಕಾಲ ಅದರೆಡೆಗೆ ದುಡಿಯುವ ಶಕ್ತಿಯನ್ನು ಕೊಡುವ ಆ ಸಂ’ಭ್ರಮ’ ಬರಿಯ ಭ್ರಮೆಯಾಗದೇ ಸದಾ ಕಾಲ ಉಳಿಯುವಂತಾಗಲಿ. ಕಾಲಃ ಕ್ರೀಡತಿ ಗಚ್ಛತಿ ಆಯುಃ ಎನ್ನುವಂತೆ ಕಾಲವು ಆಡಾಡುತ್ತಲೇ ನಮ್ಮ ಆಯಸ್ಸು ಮುಗಿದು ಹೋಗುತ್ತಿರುತ್ತದೆ. ಸಾಧನೆಗೆ ಅವಕಾಶಗಳು ಬಂದಾಗ ಸದುಪಯೋಗಪಡಿಸಿಕೊಳ್ಳಬೇಕು. ಉದ್ಯಮದಲ್ಲಿ ಸಮಯಕ್ಕೆ ಹೆಚ್ಚು ಬೆಲೆ. ತಕ್ಷಣದ ನಿರ್ಧಾರಗಳು ಅತೀ ಮಹತ್ವದ್ದಾಗಿರುತ್ತದೆ. ಹಾಗಾಗಿ ನಾವು ತೆಗೆದುಕೊಳ್ಳುವ ಸಂಕಲ್ಪಗಳು ಆರಿ ಹೋಗುವ ಮಾತು ಹಾರಿ ಹೋಗುವ ವಿಷಯಗಳಂತಲ್ಲದೆ ಗಟ್ಟಿಯಾಗಿ ನಿಲ್ಲಬಲ್ಲ ಮತ್ತು ದೀರ್ಘಕಾಲೀನ ಸ್ಥಿತಿಯಾಗಿ ಉಳಿಯಲಿ. ಪ್ರತಿ ವರ್ಷವೂ ಒಂದಿಲ್ಲೊಂದು ಹೊಸತನ್ನು ಅನ್ವೇಷಿಸುವ ಮನಸ್ಸಿನೊಂದಿಗೆ ನಾವು ಕ್ಯಾಲೆಂಡರ್ ಹೊಸ ವರ್ಷವನ್ನು ಸ್ವಾಗತಿಸೋಣ.