“ಏನ್ ಜನಾನೋ ಏನೋ.. ಸರಿಯಾಗಿ ಮಾತಾಡಕ್ಕೂ ಬರಲ್ಲ. ನಮ್ಮೆನ್ನೇನು ಅವರ ಮನೆ ಆಳು ಅಂತ ತಿಳ್ಕೊಂಡಿದಾರಾ? ಸಾಕಪ್ಪಾ ಈ ಕೆಲ್ಸ”, ನರ್ಸ್ ಸುಂದರಿಯ ಧ್ವನಿ ಓಪಿಡಿ ತುಂಬಾ ಕೇಳಿಸುತ್ತಿತ್ತು. ಡಾ. ಶುಭಾ ರೋಗಿಗಳನ್ನು ಪರೀಕ್ಷಿಸುತ್ತಿದ್ದರು. ಇದಾದ ಸ್ವಲ್ಪ ಹೊತ್ತಿನಲ್ಲೇ ಮತ್ತೆ ನರ್ಸಿಂಗ್ ಕೌಂಟರ್ ಬಳಿ ಜೋರಾದ ವಾಗ್ವಾದ ಕೇಳಿ, ಡಾ.ಶುಭಾ ಓಡಿ ಬಂದರು. ಏನೆಂದು ವಿಚಾರಿಸಲು, ವಿಷಯ ತಿಳಿಯಿತು.. ಇದಾಗಲೆ ತಪಾಸಣೆಗೆ ಬಂದಿದ್ದ ರೋಗಿಯೊಬ್ಬರಿಗೆ, ಕೆಲವು ರಕ್ತ ಪರೀಕ್ಷೆಗಳನ್ನು ಮಾಡಿಸಿ, ಅದರ ಫಲಿತಾಂಶದೊಂದಿಗೆ ಪುನಃ ಬಂದು ವೈದ್ಯರನ್ನು ಕಾಣಲು ಹೇಳಿತ್ತು. ಅವರಿಗೆ ಅಂತಹ ಗಂಭೀರವಾದ ಸಮಸ್ಯೆಯೇನೂ ಇಲ್ಲದಿದ್ದರಿಂದ ಯಾವ ಮಾತ್ರೆಗಳನ್ನೂ ಕೊಟ್ಟಿರಲಿಲ್ಲ. ಆ ರೋಗಿಯ ಜೊತೆ ಬಂದಿದ್ದ ಸಂಬಂಧಿ ಓಪಿಡಿ ಶುಶ್ರೂಷಕಿಯೊಂದಿಗೆ ಮಾತ್ರೆ ಕೊಟ್ಟಿಲ್ಲ ಎಂದು ಹೇಳಿದಾಗ, ಆಕೆ ನೀವು ರಿಪೋರ್ಟ್ ತನ್ನಿ ನಂತರ ಬರೆದುಕೊಡುತ್ತಾರೆ ಎಂದು ಹೇಳಿದ್ದಾಳೆ. ಅದಕ್ಕೆ ಆತ, ಆ ಶುಶ್ರೂಷಕಿಗೆ, “ನೀವು ಹೊಟ್ಟೆಗೇನು ತಿಂತೀರಾ? ರೋಗಿಗೆ ಸರಿಯಾಗಿ ಚಿಕಿತ್ಸೆ ಮಾಡಿಲ್ಲ..”, ಹಾಗೇ ಹೀಗೆ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾನೆ. ಅದಕ್ಕೆ ಆ ಶುಶ್ರೂಷಕಿಗೂ ಸಹನೆ ಮುರಿದು, ಅವಳು ದನಿಯೇರಿಸಿದ್ದಾಳೆ.. ಇದು ರೋಗಿಯೊಂದಿಗೆ ಸರಿಯಾಗಿ ಸಂವಹನ ಮಾಡದಿದ್ದಾಗ ಆಗುವ ಪರಿಸ್ಥಿತಿ. ಆ ರೋಗಿ ಆಹಾರ ಸೇವಿಸದೆ ಬಂದಿರುವುದು ಯಾರಿಗೂ ಗೊತ್ತಿಲ್ಲ. ವೈದ್ಯರು ಅವರ ರೋಗಲಕ್ಷಣಗಳಿಗೆ ಮಾಡಿಸಬೇಕಾದ ಪರೀಕ್ಷೆಗಳನ್ನು ಹೇಳಿದ್ದಾರೆ. ರೋಗಿಯ ಸಂಬಂಧಿ, ಪರೀಕ್ಷೆಗಳ ಫಲಿತಾಂಶ ಬರುವವರೆಗೂ, ರೋಗಿ ಉಪವಾಸ ಇರಬೇಕೆಂದು ಅಪಾರ್ಥ ಮಾಡಿಕೊಂಡು, ಎಲ್ಲರನ್ನೂ ದೂಷಿಸತೊಡಗಿದ್ದ. ಅವನನ್ನು ಪುನಃ ನನ್ನ ಕೊಠಡಿಗೆ ಕರೆದು ಕೂಲಂಕಷವಾಗಿ ಎಲ್ಲವನ್ನೂ ವಿವರಿಸಬೇಕಾಯಿತು!!