ಪ್ರಾಚೀನ ಕಾಲದಿಂದಲೂ ಮಾನಸಿಕ ರೋಗಗಳ ಚಿಕಿತ್ಸೆ ಬಹುಮಟ್ಟಿಗೆ ಮೂಢನಂಬಿಕೆಗಳು ಮತ್ತು ಮತ ಸಿದ್ಧಾಂತಗಳ ಮೇಲೆ ಅವಲಂಬಿತವಾಗಿದ್ದವು. ಈಚೆಗಷ್ಟೇ ನಮ್ಮ ಕಾಲದಲ್ಲಿ ಮಾನಸಿಕ ರೋಗಗಳಿಗೂ ದೈಹಿಕ ರೋಗಗಳಿಗೆ ಸಿಗುವಷ್ಟೇ ಗಮನವೂ ಸಹಾನುಭೂತಿಯೂ ಸಿಗುತ್ತಿದೆ. ಆಧುನಿಕ ಮನಃಶಾಸ್ತ್ರದ ಬೆಳವಣಿಗೆಯು ಸಾಧ್ಯವಾದದ್ದು ಮಾನಸಿಕ ಚಿಕಿತ್ಸೆಯಲ್ಲೂ ದೈಹಿಕ ಚಿಕಿತ್ಸೆಯಲ್ಲೂ ಉಂಟಾದ ಪ್ರಗತಿಯಿಂದಷ್ಟೇ ಅಲ್ಲದೇ ಮಾನಸಿಕ ರೋಗಗಳ ಬಗ್ಗೆ ಸಮಾಜದ ನಡವಳಿಕೆಯ ಸುಧಾರಣೆಯಿಂದ ಎನ್ನಬಹುದು. ವರ್ತನೆಯಲ್ಲಿನ ತೊಂದರೆಗಳ ಬಗ್ಗೆ ತಿಳಿಯುವುದಾಗಲಿ ಅದರ ಚಿಕಿತ್ಸೆಯಲ್ಲಾಗಲಿ ಉಂಟಾಗಿರುವ ಪ್ರಗತಿಯ ಶ್ರೇಯಸ್ಸು ಸಲ್ಲುವುದು ಸಮಾಜದ ಮೌಢ್ಯ ಮತ್ತು ಆಳವಾಗಿ ಬೇರೂರಿದ್ದ ಪೂರ್ವಾಗ್ರಹಗಳ ವಿರುದ್ಧ ವೈಜ್ಞಾನಿಕ ಮನೋಭಾವ ನಡೆಸಿದ ಸೋಲೊಪ್ಪದ ಹೋರಾಟಕ್ಕೆ ಎಂಬುದು ನಿರ್ವಿವಾದ.